Ik heff mi denn umhört, wat ik denn so moken kunn um mien schlappen Body so richtig wedder op Swung to bringen. De een seggt ik schull mi man een Fohrrad anschaffen und jeden Dag so an de tein Kilomeiter fohrn, bi Wind un Wedder. Ne heff ik dacht, dor warst je driest noch natt bi, und heff mi dat ut'n Kopp sloogen.   Wi dat denn mit Fitness-center utseh, meen een anner. Aver dor genier ik mi doch noch een beten, so meern mang de annern Lüüd rumspaddeln und dat moken wat een de Obermagger vertelln deit. Wer also uk nix. Footballspeelen keem noch as Vörschlag. Ik und Footballspeelen? Dor is doch dat schöne Speel to End bit dat ik denn Ball man eenmol vör mien Fööt krieg. Und denn, Footballspeelen mokt doch to Huus vör dat Puschenkino am meisten Spooß. So mit 'n Buddel Beer und Soltstangen, Zigaretten und Bunsches. Aver dorvun warst nich fit. Ne, dat muß wat anneres sien.

"Nimm doch'n Hund" säh mien Nohwehr. "Dor hest du een feinen Kolleg in und muss jeden Dag mit em Gassi gohn, wieldat dat Tier Utloop hem mutt. Und dorbi bekummst denn sülms uk Bewegung mit vun af". Dat is een feinen Vörslag, dach ik. Und nohdem dat denn över Nacht so richtig dörch mien Breegen lopen is, bün ik los und heff mi een veerbeinigen Bello holt. Gebruksanwiesung weer mit dorbi. Mok heel veel Spooß so'n Tier. Muß em wat to freten geben, Woter to slappen, muß em striekeln, mit em snacken, ...und - muß mit em Gassi gohn. Dat weer je dat watt ik eegendli wull: Bewegung.

Nun muß ik jeden Dag mit dat Tier rut und loopen, und noh een kötte Tied fung ik an Jogging dorut to moken. Mie lütten Speckbuuk wor mit de Tied weniger und ik fööl mi as een Kerl vun twintig Johrn. Man, dat is jo uk nix schlechtes bi Sünnschien buten inne Natur sotoseggen...  Nur bi Regen is dat ni so angenehm. Ik meen mi mokt dat nix ut, wenn de Köter natt wor, aver mien Body, vun dat veele Joggen hatt as een Isenbohnpohl, denn muss ik plegen. De döss ni natt warn, kunn je ween dat mien Superbody smölten dee. Watt denn?

Und dissen Dag schütt dat Woter as ut Ammern. De Hund brukt sien Utloop und janker ok jeden Dag dornoh, aver ik hal keen Lust natte Kleedasch to kriegen, - wat doon? De besten Infälle krist denn, wenn du inne Schiet sitt´s.                      Womit kummst vörwarts und warst ni natt? Mit een Auto!

Denken und doon weer eens. Ik nehm mi dat Auto ünnern Moors, de Hund kreeg Order dat he nu achterran loopen schull und los gung dat. So bekem he wenigstens sien Utloop. Watt hebb wi fein jogging mokt denn Dag. Dat wer so schön, dat muss ik denn annern Dag doch glieks nochmol utprobeern. Ditmol ohne Regen, und dat gung uk. Disse Ort vun Gassi gohn gefull mi jeden Dag beter. Und däh uk den Hund bannig good. He weer gesund und kräftig, hal een gude Lunge und een goodet Hatt. Mien Auto bekeem uk watt vun de schöne Gegend to sehn und de Kolbens vun de Motor kreegen Bewegung.

Nur dat mien Fründin wedder "meine süsse kleine Speckschwarte" to mi seggen däh, dat gev mi doch watt to'n Nohdenken.