| Manfred Beyer | |
| Dithmarscher Oort ! | |
|
Wenn im Sommer de Kurgäste bi uns sünd, denn kannst af und an mol een seggen
hörn dat de Dithmarscher stur sünd. Nu, dat de Dithmarscher stur sünd kann ik ni
seggen, ik meen dat is ni stur, ik meen dat is eer eegen Oort. Wi sünd nich stur, wi
sünd - wortkark, dat meent, wi snakt nich so veel. Und dor meent de "Turis"
eben dat wi stur sünd . Versteis mi?
Um kloor to mooken wat ik meen, will ik jümm disse lütt Geschicht vertell'n. Jehann und Hein weern twee Buern de sik op Oolendeel torüch trocken hal'n. Wi se nu nix mehr so richtg to doon hal'n, dor dreepen se sik meist jeden Dag op de Brügg, an't Fleet in't Döörp. Dor gung jümmers dat sülve Speel af. De een keem vun West'n und de anner vun Oost'n. Veel snakt wor nich, - ik will seggen, snakt wor gornich. Moin säh de eene, Moin Moin säh de annere. Denn keeken se övert Gelänner int Water und smöök'n de Piep. Wenn se nun genog nix seggt harn, und de Piep leerdig smöökt, weer säh'n se Tschüß und gungen noh Huus. Een gooden Dag's bekeem Jehann Besöök, wat schull he moken, wenn he de Piep an't Fleet ni verpassen wull, denn muss de Besöök mit. Hein weer all dor as se ankeemen. "Moin" säh Jehann. "Moin Moin" säh Hein. "Guten Tag, schönes Wetter heute nicht?" säh de Besöök. Nächsten Dag weern de beiden wedder alleen. Se stunnen an't Gelänner, und as de Piep so halv opsmöökt weer door säh Heini "Du Jehann" Pause "Wat is" säh Jehann. "Denn vun Güstern, denn bring man ni wedder mit, de snakt toveel" säh Hein. "Geit kloor" säh Jehann. Süh, dat is Dithmarscher Oort. Bruuks doch ni vertell'n dat dat een schönen Dag is. Süht doch jedereen.
|
|