Van Carola H. Jorns-Osterloh ut Südbrookmerland

Uns Kitty – een pickschwarde Puus mit witte Pootjes, witte Kullerbuukje un een witte Schnuutje – is egentlijk een „geleasde“ Kaat un hollt uns Dagg för Dagg up Trapp. Unner uns sergt: Se is as ’n lüttje Kind: stadig um uns to, liebebedürftig un verschmust, neesgierig as man wat un hör kannst kien X för een U vöörmaaken.

Vör een Johr in d’ Februarmaand mussen wi uns Schkäferhund-Collie-Mischling Prischa schworn Hartens inschlapen laaten. Dor hebb ik düchtig unner leeden, tomol wi uns „Wicht up veer Pooten“ ower elf Johr harrn. Man kann sück doch gau an so ’n Deerke wennen.
 Gaud dree Weeken laater stunn up ’n Mol een lüttje schwart-witte Kaat vör uns Döör un miaude mi an. Anfangs sach se ut as al schwart-witte Katten, nix besünners. Doch dör hör leew Art schlooten wi hör gau in uns Hart.
 Ik hebb hör hochhoben, ait un se leep mi in d’ Huus na, as off se hier all lang Johrn wohnen dee. De lüttje Frechdachs!
 Dat harrn Ji mol sehn musst: In Dauerloop wurn all Ruumen unnersöcht, mit een Schwupps – kunnst bold neet tegen kieken – weer de lüttje Puus all boben in d’ Schlapkamer. „Dat mach ja noch wat worn“, doch ik mi.
Nu is dat all ower een Johr her un disse lüttje Kattenwicht, de up de Naam Kitty hört, hett mien Mann un mi sotosergen „adopteert“. Se hollt uns up Loop, is „Herrin“ in d’ Huus un bi mien Kerl hett se sowat as „Narrenfreiheit“.
 Mit de Naam-Utsökeree weer dat ook so ’n Akt: Disse Ruck-Zuck-Naam keemen mi neet in d’ Püüt: „Mohrle“, „Blacky“, „Pussi“ off „Maunzi“. Nee – een besünner Kaat sull ook een besünner Naam hemm. Anfangs dochen wi an „Ronja“, „Shari“, „Kati“, „Laura“, „Mona“ off so. Dann murken wi gau, dat uns Puus „i“-bezogen weer. Also keem bloot sowat as „Mimi“, „Lilly“, „Whisky“ off ehm „Kitty“ in Fraag. „Mimi” harr – ik weet neet genau worum – neet to uns Kaat paast, un „Lilly” heet al de Kaat van mien Bekannte. „Whisky” kannst schlechten buten roopen, dann büst futt unnern dör bi de Nahbers. Also nammen wi „Kitty“. Ut „Kitty“ word abers he nun weer ook een „Katinka“, wenn hör de Düvel in d’ Naak sitt un se wat anstellt. Un uns  Kaat weet all heel genau, wenn ik „Katinka“ roop, dat se dann wat utfreeten hett.
 Wenn man uns Kaat wat utslaan will, kiekt se een blood mit hör groode gröön Oogen an, schmitt Koppke in d’ Naak un klimpert as ’n lüttje Diva. Dann worst futt week un giffst na. Dat hett uns Puus jedenfalls al gaud drup.
 Wenn dat buten düchtig gallert und regent, will se neet ruut. Ook neet wenn Schnee liergt off wenn et störmt. Se sitt dann am allerleewsten up de Rückenleehn van uns Wohnzimmergarnitur un luurt ut d’ Fenster un is an d’ Wiesnöösen.
 Wenn uns Kitty schietnatt van d’ Reegen weer in d’ Huus will, schrubbel ik hör mit een blau oll Handdöök dröög. Dann holt se immer fein still un lett sück dat gefallen.
 Kitty mach soooo gern mien Orchideen-Blöömkes lieden. Wenn se sück unbeobacht föhlt, tickjet se mit hör Pootje an een Blöömke, noch mal un noch mal. Und dann – etappenwies – immer doller, bit dat de heele Plaant samt Blomenpott bold umkippt. Dann word et Tied, dat ik uns lüttje Plagegeist offlenk, mit hör spööl off eenfach bloot in d’ Köken roop. Un wenn’t heel un daal neet anners geiht, kummt uns Puus rut.
 De Köken is eegentlijk hör „Lieblings-Ruum“. Kitty hett hör eegen Potten, sogor een groode Döös mit lüttje Kattenbillers drup (dor sünd hör Leckerlis drin). An disse Futter-Döös bruukst bloot ankomen, dann steiht se all as „Pick 7“ d’rtegen.
 Langwiel hest mit een Puus garanteert neet. Besünners wenn se hör Fief-Minüden kriegt un as ’n Malln dör d’ Huus flücht. He nun weer spölt uns Kitty ook Katten-Kreisel (se versöcht, hör Steert to fangen, löppt bloot in d’ Rurnd). Dann is et hör ook gliek, wenn well d’rbi steiht; de word dann eenfach umloopen off tominnst anrempelt. Dor kennt uns lüttje „Madame“ kien Pardon!
 Un tegen Avend will se neet mehr rut. Wenn et kolt is, sowieso neet. Am leewsten „drapeert“ se sück bi uns in d’ Schlapkamer up d’ Bügelbrett. Dor hebb ik hör nämlijk een olle Strickjaak uppackt, worup se immer gern liergt (jedenfalls solang dat Lücht noch an is). Sobold ik mi in mien Nüst plumpsen laat, düürt dat kien twee Minüden un uns Puus maakt et sück an mien Foot-Enn bequem. Neet immer, aber immer öfters. Hen un weer hett Kitty 2/3 van d’ Bett intus. Mennigmool bün ik all mörgens upwacht un mi deen de Knooken sehr, weil ik de halve Nacht so verrenkt in mien Bett lagg. Mien Bekannde see all to mi: „Katten hörn neet in d’ Schlapkamer. Koop hör man een Kattenkörff, dor kann se dann in schlapen.“ Van wegen! Uns Puus blifft sowieso neet lang in de Körff liergen, dann is se – hör Meenen na – wiet „van d’ Schuss“.
 Doch wenn so een lüttje Pussi heel versichtig ankummt un sück lütt as ’n Muuske maakt, un di ook noch so grood ankiekt, kannst hör eenfach neet rutschmieten. Kann een sergen, wat he will: Ik breng dat jedenfalls neet owert Hart…

Startseite                 Zurück